Stein Torleif Bjella og Tvangsgutan kompani

Vi ynskjer den populære visekunstnaren og rimsmeden frå Hallingdal, Stein Torleif Bjella, velkomen til Valdres og Jaslangen! Den folkekjære visesongaren kjem til Jørn Hilme-stemnet og solefallskonserten saman med sitt eminente band, og vi reknar med at det blir folksamt i lyngen denne kvelden. Bjella og Tvangsgutan kompani vil servere oss sine sorgmuntre skråblikk på livet, og jammen byr dei også opp våre lokale musikarar Sindre Tronrud og Marit Karlberg til samspel. Dette blir ein kveld som er vel verdt å få med seg!

Solefallskonserten er på stølslaget Jaslangen i Vestre Slidre. Arenaen ligg i ei helling som dannar eit naturleg amfi og der fjella og naturen gjev storslegne rammer kring musikken.

Medverkande:

• Stein Torleif Bjella
• Geir Sundstøl
• David Wallumrød
• Kenneth Kapstad
• Eirik Øyen
• Sindre Tronrud
• Marit Karlberg

Buss:

Jørn Hilme-stemnet er oppteke av gode miljøløysingar og set difor opp bussar frå fleire plassar i Valdres. Du må førehandsbestille bussbillett på TicketCo for å nytte deg av dette tilbodet.

Frå Fagernes: Fagernes skysstasjon (avgang 18.45), via Ulnes kyrkje (avgang 19.00), via Vaset senter (19.15) – og direkte til Jaslangen.

Frå Slidre/Røn: Slidretun (avgang 18.45) via Røn samfunnshus (avgang 19.00), vidare Brekkudn – Vaset senter og til Jaslangen.

Bil:

Frå Fagernes køyrer du E16 til Ulnes, ta av til Vaset og følg skilting til Jaslangen. Turen frå Fagernes tek ikring 50 minutt. Adressa er Jaslangvegen 618. Vi oppmodar alle til samkøyring.

God tur, god konsert!